৮০ বছৰীয়া বৃদ্ধায়ো ৰেহাই নাপালে। ডকাইতিৰ পিছত ধৰ্ষণ (Rape and Murder) কৰি তেওঁক নৃশংসভাৱে হত্যা কৰা হয় । সোমবাৰে কৰ্ণাটকৰ কোলাৰ জিলাত সংঘটিত হয় এই ঘটনা। ইতিমধ্যে আৰক্ষীয়ে তদন্তৰ অন্তত অভিযুক্তক গ্ৰেপ্তাৰ কৰিছে। মঙলবাৰে অভিযুক্তক আদালতত হাজিৰ কৰি ন্যায়িক জিম্মালৈ প্ৰেৰণ কৰে। কোলাৰ জিলাৰ শ্ৰীনিবাসপুৰা চহৰত সংঘটিত হৈছে এই ঘটনা। কোলাৰ জিলাৰ বাসিন্দা বৃদ্ধাগৰাকী।
সোমবাৰে সন্ধিয়া শ্ৰীনিবাসপুৰাৰ মুলবাগাল পথৰ পথাৰ এখনৰ সমীপৰ গেৰেজত উদ্ধাৰ কৰে নিৰ্যাতিতাৰ ক্ষত-বিক্ষত মৃতদেহ। প্ৰাথমিক তদন্তত প্ৰকাশ পাইছে যে ধৰ্ষণৰ পিছত তেওঁক হত্যা কৰা হৈছিল। আৰক্ষীৰ সূত্ৰ অনুসৰি, ধৃত ৩৭ বছৰীয়া যুৱকজন শ্ৰীনিবাসপুৰাৰ গফ্ফাৰ খান মহল্লাৰ বাসিন্দা।
দুদিনমান পূৰ্বে নিৰ্যাতিতা শ্ৰীনিবাসপুৰাৰ এখন গীৰ্জালৈ যাবৰ বাবে ঘৰৰ পৰা ওলাই আহিছিল। ইয়াৰ পিছত তেওঁ দুদিন শ্ৰীনিবাসপুৰাত আছিল। ভ্ৰমণৰ অন্তত সোমবাৰে সন্ধিয়া তেওঁ ঘৰলৈ উভতি আহে। অভিযোগ অনুসৰি, সোমবাৰে সন্ধিয়া বৃদ্ধাগৰাকীয়ে বাছৰ বাবে অপেক্ষা কৰি আছিল।
তেতিয়াই অভিযুক্ত যুৱকজনে তেওঁৰ পিছে পিছে যায়। তাৰ পিছত সুযোগ লৈ বলপূৰ্বকভাৱে নিৰ্জন এলেকালৈ লৈ গৈ ধৰ্ষণ কৰে বুলি অভিযোগ উঠিছে। ধৰ্ষণৰ পিছত তেওঁক ডিঙি চেপি হত্যা কৰা হয়। অভিযোগ অনুসৰি, অভিযুক্তই পলায়নৰ পূৰ্বে মৃতকৰ বেগৰ পৰা ১৫ হাজাৰ টকাও লৈ যায়।
আৰক্ষীয়ে তদন্তৰ অন্তত অঞ্চলটোৰ চিচিটিভি ফুটেজ পৰীক্ষা কৰে। আৰক্ষীৰ দাবী যে ফুটেজত স্পষ্টকৈ দেখা গৈছে যে অভিযুক্তই বলপূৰ্বকভাৱে বৃদ্ধাগৰাকীক টানি লৈ গৈছে। আৰক্ষীয়ে তদন্ত চলাই থকাৰ সময়তে অভিযুক্তই কোনো প্ৰমাণ বাকী আছে নেকি চাবলৈ সেই স্থানলৈ উভতি যায়। সেই সময়ত আৰক্ষীয়ে তৎক্ষণাত তেওঁক চিনাক্ত কৰি গ্ৰেপ্তাৰ কৰে।
আৰক্ষীৰ দাবী যে অভিযুক্তই জেৰাৰ সময়ত ধৰ্ষণ আৰু হত্যাকাণ্ডৰ কথাও স্বীকাৰ কৰে। ধন আৰু গহনা লুণ্ঠনৰ বাবে এই অপৰাধ সংঘটিত কৰাৰ পৰিকল্পনা কৰা বুলি অভিযুক্তই জানিবলৈ দিয়ে। ভাৰতীয় দণ্ডবিধিৰ সংশ্লিষ্ট ধাৰাত অভিযুক্তৰ বিৰুদ্ধে গোচৰ ৰুজু কৰা হৈছে।
