Rahul VS Modi I ‘মোডী উপাধি’ গোচৰ : ৰাহুলৰ শাস্তি স্থগিতাদেশৰ আবেদন খাৰিজ গুজৰাট উচ্চ ন্যায়ালয়ৰ

লোকসভাৰ সাংসদ পদ পুনৰ লাভৰ আশা ইতিমধ্যে শেষ হৈছিল। এইবাৰ কংগ্ৰেছ নেতা ৰাহুল গান্ধীয়ে (Rahul Gandhi) জে’ললৈ যোৱাৰ সম্ভাৱনাৰ সন্মুখীন হৈছে। গুজৰাটৰ চুৰাটৰ (Gujrat Surat) দণ্ডাধীশ আদালতে ২৩ মাৰ্চত ৰাহুলক ‘ফৌজদাৰী মানহানি’ গোচৰত দোষী সাব্যস্ত কৰিছিল, যিটো গোচৰ ২০ এপ্ৰিলত চুৰাটৰ অতিৰিক্ত চেচন ন্যায়াধীশ আৰ পি মোগেৰাই সমৰ্থন কৰিছিল বুলি শুকুৰবাৰে গুজৰাট উচ্চ ন্যায়ালয়ে সমৰ্থন জনায়।

‘ফৌজদাৰী অৱমাননা’ গোচৰত দোষী সাব্যস্ত হোৱা ৰাহুলক চুৰাট দণ্ডাধীশ আদালতে দুবছৰৰ কাৰাদণ্ডৰ শাস্তি স্থগিত ৰখাৰ বাবে ৰাহুলৰ আবেদন নাকচ কৰে উচ্চ ন্যায়ালয়ৰ ন্যায়াধীশ হেমন্ত প্ৰচ্চাকৰ বিচাৰপীঠে। ৰায় ঘোষণা কৰাৰ সময়ত ন্যায়াধীশ প্ৰচ্চাকে কয়, “ৰাহুল গান্ধীৰ শাস্তি সন্দৰ্ভত নিম্ন আদালতে দিয়া ৰায় শুদ্ধ।” ফলত ৰাহুলে সম্প্ৰতি কেৰালাৰ ৱেনাৰ্ডৰ পৰা সাংসদৰ পদ ঘূৰাই নাপায়। ২০২৪ চনৰ লোকসভা নিৰ্বাচনৰ প্ৰতিদ্বন্দ্বিতাক লৈও সন্দেহৰ সৃষ্টি হৈছে। তাৰ লগতে জে’ললৈ যোৱাৰ আশংকাও আছে।

উল্লেখযোগ্য যে ২৩ মাৰ্চত গুজৰাটৰ চুৰাট দণ্ডাধীশ আদালতৰ ন্যায়াধীশ এইচ এইচ বাৰ্মাই (H H Varma) কৰ্ণাটকৰ কোলাৰত ২০১৯ চনৰ লোকসভা নিৰ্বাচনৰ প্ৰচাৰৰ সময়ত আপত্তিজনক মন্তব্য কৰাৰ অপৰাধত ৰাহুল গান্ধীক ২ বছৰৰ কাৰাদণ্ড বিহে।

কিন্তু ন্যায়াধীশগৰাকীয়ে ‘ফৌজদাৰী মানহানি’ গোচৰত ৰাহুলৰ জামিন আবেদনৰ অনুমতি দি উচ্চ ন্যায়ালয়ত ৰাহুলৰ বিৰুদ্ধে আপীল কৰিবলৈ ৩০ দিনৰ সময় দিয়ে। ২৪ মাৰ্চত লোকসভাৰ অধ্যক্ষ ওম বিৰলাই ভাৰতৰ সংবিধানৰ ১০২(১) অনুচ্ছেদ আৰু জনপ্ৰতিনিধিত্ব আইন (১৯৫১)ৰ ৮(৩) অনুচ্ছেদ অনুসৰি, চুৰাট দণ্ডাধীশ আদালতৰ ৰায়ৰ ভিত্তিত ৰাহুলক সাংসদ পদৰ পৰা বৰ্খাস্ত কৰে।

ইয়াৰ পিছতে ৰাহুলে দোষী সাব্যস্ত হোৱাৰ বিৰুদ্ধে যোৱা ৩ এপ্ৰিলত চুৰাটৰ ছেছন আদালতত দাখিল কৰে আৰু শাস্তি স্থগিত ৰাখিব বিচাৰে। কিন্তু ২০ এপ্ৰিলত অতিৰিক্ত ছেছন ন্যায়াধীশ আৰ পি মোগেৰাই এই আবেদন খাৰিজ কৰি শাস্তি সমৰ্থন কৰে। ফলত তেওঁ পুনৰ সাংসদ পদ লাভ কৰাৰ সুযোগ হেৰুৱালে।

এপ্ৰিল মাহৰ তৃতীয় সপ্তাহত ৰাহুলৰ অধিবক্তা বি এম মাংগুকিয়াই চুৰাট ছেছন আদালতে শাস্তি কাৰ্যকৰী কৰাৰ নিৰ্দেশৰ ওপৰত স্থগিতাদেশ বিচাৰি উচ্চ ন্যায়ালয়ত দাখিল কৰে। এই আবেদনখন ন্যায়াধীশ গীতা গোপীৰ বিচাৰপীঠৰ সন্মুখত শুনানিৰ বাবে তালিকাভুক্ত কৰা হৈছিল।

কিন্তু গুজৰাট উচ্চ ন্যায়ালয়ৰ ন্যায়াধীশ গোপীয়ে হঠাতে গোচৰৰ শুনানিৰ পৰা আঁতৰি যায়। তেওঁ উচ্চ ন্যায়ালয়ৰ পঞ্জীয়কক এই গোচৰটো মুখ্য ন্যায়াধীশৰ ওচৰলৈ প্ৰেৰণ কৰিবলৈ নিৰ্দেশ দিয়ে। ইয়াৰ পিছত গোচৰটো ন্যায়াধীশৰ বিচাৰপীঠলৈ যায়। প্ৰাথমিক শুনানিৰ অন্তত ন্যায়াধীশে দোষী ৰাহুলৰ অন্তৱৰ্তীকালীন জামিন সমৰ্থন কৰে।

কিন্তু ৰায়দান স্থগিত ৰখা নাছিল। শুকুৰবাৰে ন্যায়াধীশে শাস্তি কাৰ্যকৰী কৰাৰ ক্ষেত্ৰত স্থগিত ৰখাৰ অনুমতি নিদিয়াৰ বাবে এইবাৰ ৰাহুলে উচ্চতম ন্যায়ালয়ৰ কাষ চাপিব লাগিব বুলি আইনী বিশেষজ্ঞৰ এটা অংশই ধাৰণা কৰিছে।