ASSAM TIMES POST
ডিফুঃ অৱশেষত ধনশিৰি, দলদলী সংৰক্ষিত বনাঞ্চলৰ মিচিবাইলামৰ এক গভীৰ এলেকাত মঙলবাৰে গুলীবিদ্ধ হোৱা বন্যহস্তীটোক বনবিভাগে চিকিৎসা প্ৰদান কৰিবলৈ সক্ষম হ’ল৷ প্ৰাপ্ত খবৰ অনুসৰি যোৱা বুধবাৰে ধনশিৰি থানা দলদলী সংৰক্ষিত বনাঞ্চলৰ এলেকাধীন তুলাৰাম আৰু মিচিবাইলামৰ হাবিত বনবিভাগে এটি গুলীবিদ্ধ বন্যহস্তী প্ৰত্যক্ষ কৰে৷
বন্যহস্তীটো নাগালেণ্ডৰ ইটাংগী বনাঞ্চলৰ পৰা ওলাই অহা বুলি বনবিভাগৰ লোকে সন্দেহ কৰিছে৷ বুধবাৰে বনবিভাগৰ দল আৰু বেটেলিয়নৰ দলে সন্ধিয়া কাজিৰঙাৰ পৰা অহা চিকিৎসকৰ দলক লগতলৈ হাবিত প্ৰৱেশ কৰে যদিও পৰ্যাপ্ত পোহৰৰ অভাৱত হাতীটোক চিকিৎসা প্ৰদানত ব্যৰ্থ হয়৷
আজি পুৱা পুনৰ বনবিষয়া ধনীৰাম ৰংপিৰ নেতৃত্বত বনবিভাগৰ ৰাঙাপাহাৰ ডিভিজনৰ কাৰবি আংলং কনাজাৰভেছন ভলণ্টিয়েৰৰ এক অভিযানকাৰী দলে অভিযান চলাই বন্যহস্তীটোক বিচাৰি উলিওৱাৰ পিছত হাতীটোক ট্ৰেংকুলাইজ কৰি হাতীটোৰ জখমপ্ৰাপ্ত ভৰিত প্ৰাথমিক চিকিৎসা আগবঢ়ায়৷
বন্যহস্তীটোক চিকিৎসা আগবঢ়োৱা কাজিৰঙাৰ পৰা অহা চিকিৎসক প্ৰাণজিৎ বসুমতাৰীয়ে সাংবাদিকৰ আগত কয়যে হাতীটোক কোনো দূৰ্বৃত্তই দেশীয়ভাবে নিৰ্মিত বন্দুকেৰে গুলীয়াই আগফালৰ সোঁভৰিত জখম কৰিছে৷ সাময়িক ভাবে প্ৰাথমিক চিকিৎসা আগবঢ়োৱা হৈছে যদিও প্ৰয়োজন বশতঃ পিছলৈ অস্ত্ৰোপচাৰ কৰিবলগীয়া হলেও সেয়া কৰা হ’ব বুলি জনায়৷ উল্লেখযোগ্য যে উক্ত অভিযানত সাংবাদিকৰ দল এটাও অভিযানকাৰী দলৰ লগত আছিল৷
