বিমানবন্দৰৰ পৰা সোণ সৰবৰাহ কৰাৰ সময়ত চোৰাং ব্যৱসায়ীয়ে বিভিন্ন পন্থা অৱলম্বন কৰে। অৱশ্যে বিমানবন্দৰৰ নিৰাপত্তাৰক্ষীৰ হাতত ধৰা পৰে অপৰাধী। শেহতীয়াকৈ মুম্বাই আন্তঃৰাষ্ট্ৰীয় বিমানবন্দৰ (Mumbai International Airport)ত এনে এটা ঘটনা পোহৰলৈ আহিছে। সোণ সৰবৰাহ (Gold supply) কৰি থকা অৱস্থাত ধৰা পৰাৰ ভয়ত নিজেই সোণখিনি খাই পেলায় এজন যুৱকে (young man eats gold)। ইয়াৰ পিছতো তেওঁ নিৰাপত্তাৰক্ষীৰ নজৰ এৰাই বিমানবন্দৰৰ পৰা ওলাই যাব নোৱাৰিলে।
সোণ সৰবৰাহৰ অভিযোগত গ্ৰেপ্তাৰ হৈছে ইন্তিজাৰ আলী নামৰ ৩০ বছৰীয়া যুৱক এজন। জেৰাৰ সময়তে যুৱকজনে কয় যে তেওঁ ৭ টুকুৰা সোণ খাইছে। যুৱকজনৰ কাহিনী শুনি তদন্তকাৰী স্তম্ভিত হৈ পৰে। এক্স-ৰে কৰি যুৱকজনৰ পেটত সোণ থকা বুলি ধৰা পৰে।
ইয়াৰ পিছতে তদন্তকাৰীয়ে যুৱকজনৰ পেটৰ পৰা সোণখিনি উলিওৱাৰ সিদ্ধান্ত লয়। চিকিৎসকৰ সৈতে যোগাযোগ কৰা হয়। যুৱকজনক মুম্বাইৰ এখন চিকিৎসালয়লৈ লৈ যোৱা হয়। অৱশ্যে যুৱকজনৰ কোনো অস্ত্ৰোপচাৰ কৰা হোৱা নাছিল। যুৱকজনক ফাইবাৰযুক্ত খাদ্য খাবলৈ দিয়া হয়। প্ৰতিদিনে এক ডজন কল খুৱাই দিয়া হয়। ইয়াৰ পিছত সাধাৰণ পদ্ধতিৰে যুৱকজনৰ শৰীৰৰ পৰা ৭ টুকুৰা সোণ উলিওৱা হয়। এই ঘটনা কেতিয়া সংঘটিত হৈছিল সেয়া জানিব পৰা হোৱা নাই। শুকুৰবাৰে পোহৰলৈ আহে ঘটনাটো।
এই ঘটনাই তামিল ছবি ‘অয়ন’ৰ কথা মনত পেলাই দিয়ে। ছবিখনত দেখা যায় যে চোৰাং ব্যৱসায়ীয়ে নিষিদ্ধ ড্ৰাগছ সৰবৰাহৰ বাবে খাই পেলাইছিল। পিছত ধৰা পৰাৰ পিছত অস্ত্ৰোপচাৰ কৰা হয়। অৱশ্যে মুম্বাই বিমানবন্দৰৰ কাণ্ডত অস্ত্ৰোপচাৰৰ সন্মুখীন হʼবলগীয়া হোৱা নাছিল সোণৰ সৰবৰাহকাৰীজনে। কল খাই পেটৰ পৰা সোণ উলিয়াই অনা হয়।
