এনচিপিৰ ভিতৰত উত্তেজনাৰ মাজতে কংগ্ৰেছ নেতা ৰাহুল গান্ধীয়ে (Rahul Gandhi) শাৰদ পাৱাৰৰ কন্যা সুপ্ৰিয়া চুলেক (Supriya Sule) ফোন কৰে। সূত্ৰ অনুসৰি, এনচিপিৰ পৰৱৰ্তী সভাপতি নিৰ্বাচন আৰু ৰাষ্ট্ৰীয় ৰাজনৈতিক পৰিস্থিতিৰ বিষয়ে তেওঁলোকৰ মাজত আলোচনা হয়।
কংগ্ৰেছৰ এক সূত্ৰই জনোৱা মতে, শাৰদ পাৱাৰৰ পিছত ৰাহুল-মল্লিকাৰ্জুন খৰ্গেয়ে সুপ্ৰিয়াক এনচিপিৰ শীৰ্ষ পদত থকাটো বিচাৰে। কাৰণ বাৰামটিৰ সাংসদ সুপ্ৰিয়াক ‘বিজেপি বিৰোধী’ বুলি জনা যায়। আনহাতে, শাৰদ পাৱাৰৰ ভতিজাক তথা মহাৰাষ্ট্ৰ বিধানসভাৰ বিৰোধী দলপতি অজিত পাৱাৰ বিগত কেইবছৰমানৰ পৰা ‘বিজেপিৰ ঘনিষ্ঠ’ বুলি পৰিচিত।মঙলবাৰে বিয়লি মুম্বাইত তেওঁৰ আত্মজীৱনী উন্মোচনী অনুষ্ঠানত শাৰদ পাৱাৰে দলীয় নেতৃত্বৰ পৰা পদত্যাগ কৰাৰ কথা ঘোষণা কৰে।
যোৱা ছেপ্টেম্বৰ মাহত এনচিপিৰ ৰাষ্ট্ৰীয় অধিবেশনত শাৰদ পাৱাৰ পুনৰ দলৰ সভাপতি হিচাপে নিৰ্বাচিত হৈছিল। তাৎপৰ্যপূৰ্ণভাৱে অজিত পাৱাৰে সেইদিনা মাজভাগতে সভাখন এৰি থৈ গৈছিল। তেতিয়াৰ পৰাই দুয়োৰে সমীকৰণ সন্দৰ্ভত জল্পনা-কল্পনা চলি আহিছে। ২০১৯ৰ বিধানসভা নিৰ্বাচনৰ পাছতো এনচিপিৰ মুৰব্বী শাৰদ পাৱাৰৰ ভতিজাক অজিত হৈ পৰে ‘বিদ্ৰোহী’। বিজেপিৰ দেৱেন্দ্ৰ ফাড়নভিছে তেওঁৰ সমৰ্থনত মুখ্যমন্ত্ৰী হিচাপে শপত গ্ৰহণ কৰে।
অজিত উপ-মুখ্যমন্ত্ৰী হয়। কিন্তু এনচিপিৰ পৰিষদীয় দলৰ বিভাজন ধৰিব নোৱাৰি দুয়োজনে পদত্যাগ কৰিবলগীয়া হয়। ইয়াৰ পিছত অজিতে পুনৰ শাৰদ পাৱাৰৰ শিবিৰত আশ্ৰয় লয়। শিৱসেনাৰ মুৰব্বী উদ্ধৱ থাকৰে নেতৃত্বাধীন মহাবিকাশ আঘাৰী মিত্ৰজোঁটৰ চৰকাৰত শাৰদ পাৱাৰে তেওঁক উপ-মুখ্যমন্ত্ৰী হিচাপে নিযুক্তি দিয়ে। কিন্তু এইবাৰ দলটোক নেতৃত্ব দিব কোনে? সেই প্ৰশ্ন এতিয়া সকলোৰে মুখে মুখে।
